Su connotu e is festas

Su connotu e is festas

Is festas de arreligioni e de sa vida de sa messaria funt medas, in prus funt de interessu mannu meda is fatus de sa curtura sarda cumenti is bistiris, is prendas e is ainas, prus de totu is launeddas famadas meda.

Medas bortas arreligioni e cultura sarda àndant imparis de una manera ecisosa e sa processioni est a sonus de canna, de fisarmòniga e cun ballus in pratza.

Sa festa prus de importu est sa de su santu de sa bidda, chi dda feus su 17 de trèulas imparis a sa Festa de su Prèssiu.

De is atras festas arreligiosas arregordaus sa de Santa Prisca su 5 de mayu, chi is ossus ddus ant torraus a bogai a foras imparis a is Speratus e po cussu est sa santa de sa bidda issa puru. Is primus dexi diis de mayu festaus santu Sidoru puru, protegidori de su trigu.

Su primu domìnigu de làmpadas ddoi est su Corpus Domini: fàscias de canna, bandereddas e tapissus abèllant is domus e in ‘ias ddoi est su fragu bellu de s’amenta e de is froris spatinaus in is arrugas de sa bidda.

Su 24 de làmpadas festaus Santu ‘Anni Batista, cun d-una grandu festa arreligiosa chi pìgat fatus antigus de su solistìtziu de istadi.

S’acàpiu cun festas antigas de purificatzioni fait a ddu biri totu in sa festa de Santu Perdu e de Santu Pàuli, a s’acabu de làmpadas. Faint unu fogadoni e totu sa bidda si ponit a canta, cun in prus is pipius chi sàrtiant foghixeddus fatus aposta po issus. Est un festa antiga de sègulus chi at aporegau totu s’ecisu suu.

Su 2 de donniasantu, po sa festa de is mortus, is pipius gìrant is domus a domandai is panixeddas, po is ànimas de is mortus.

Su 13 de mes’‘e làmpadas fèstant Santa Luxia, chi anantis de unu fogadoni fatu a posta po issa, genti meda ddi domàndat amparu po is ogus o a sanai maladias de is ogus.

Po acabai, tòcat a sinnalai fintzas sa processioni bella meda de S’incontru, sa di’ ‘e Pasca Manna.

 

Festa de su Prèssiu
Impari a sa festa de su Santu de sa bidda, su 17 de mes’ ‘e argiolas, faint sa Festa de su Prèssiu chi abàrrat dexi diis.

Ponint paradas medas po tastai e pigai is prodùsius sparadesus.

Is chi benint podint connosci sa curtura e su connotu de sa bidda, ca faint manifestadas medas su Comunu cun su Comitau de sa Festa, s’Ersat e sa Pro loco.

In prus fait a biri amostas de pintura, scurpidura, fotografia, antigàmini de su logu, medas bortas in domus privadas. Gràtzias a su traballu de sa Pro Loco fait a biri totu is passus de messa e de sa trèula. Faint girus cun sa ghia po biri is muralis. Impari a is fatus de s’arreligioni ddoi est un’aparamentu curturali chi fait a apretziai is bistiris de su Connotu, is prendas e is ainas, po primu cosa is launeddas.

Su Comitau de sa Festa aparìciat dònnia cosa e a primu fait sa circa de su dinai, chi pìgat parti totu sa bidda.

Sa festa arreligiosa dda faint cun sa Missa Manna de su Predigadori, unu predi de un’atra crèsia, e cun sa processioni chi acumpàngiat sa statua ‘e su Santu in is arrugas de sa bidda. Is launeddas acumpàngiant sa preigadoria cantada de s’arrosàriu. Sighendi unu Connotu de sa Sardìnnia de Bàscius, in is arrugas a nca pàssat su Santu spraxint alas ‘e frori e amenta aresti. A-i custu Connotu ddi nant arramadura.

Data di ultima modifica: 05/01/2017

torna all'inizio del contenuto
torna all'inizio del contenuto