Po sciri

Po sciri

Oindi' chi una lìngua no dda scrieus est fàtzili meda chi si mroxat. Scriendidda, intamis, sa lìngua abarrat in is annus, pronta po dda torrai a pigai. In prus, su sadru bolit scritu po chi si intrit in conca ligendiddu puru, ligendi sa cosa chi si praxit e chi si serbit, ca ddu agataus in sadru puru.

Su sadru seus arrennescendi a ddu sarbai ca seus scriendiddu, tanti po si donai un'idea in custus ùrtimus trinta annu eus scritu in sadru prus de cantu no essimus fatu in is milli annus a primu, de candu s'agatat su sadru scritu. Sa literadura sadra e totu is atras genias de cosa scrita in sadru, funt amanniendisì sempri de prus.

Calichisiat lìngua, a dda scriri bolit nai a dònnia sonu chi tenit a ddi fai currispundi una litra. Custu est su printzìpiu, ma no sempri est aici, ca a bortas unu sonu ddu scrieus cun duas litras puru. Is litras de s'arfabetu sadru, chi espressant (rappresentano) is sonus de sa lìngua sadra e totu, ddas teneus arringheradas de sa A a sa Z, prus o mancu cumenti totu is arfabetus de is lìnguas europeas.

Chi boleis imparai a scriri su sadru, sa cosa mellus est a fai unu cursu ma chi no podeis fait a solus puru, ligendi, cumprendendi e domandendi agiudu a s'Ofìtziu de sa Lìngua Sadra e totu.

 

Una pariga de stùdius po cumprendi sa chistioni de sa scriidura:

Data di ultima modifica: 05/01/2017


Visualizza in modalità Desktop